|
Wann ick Plattdütsk häöre ...
Wann`k Plattdütsk häör`...
is`t wu `ne Stemm, de nao mi röpp,
se müntert up, wat in mi slöpp -
ick saih en`n Film, de trügges löpp.
Wann`k Plattdütsk häör`...
häör`k de Nachtigall in`n Gaorn slaon,
saih`k den Naober vüör`n Kuotten staohn,
Rauk uut Düör un Ulenlock gaohn.
Wann`k Plattdütsk häör`...
saih`k, wu in`t Feld de Maon raud glaiht,
de Wind dat riepe Kaorn düörwaiht,
de Buer `t Gräss in de Wieske maiht.
Wann`k Plattdütsk häör`...
häör`k, wu dat Saisen-Dengeln klingt,
de Dääns nao`t Melken lüstig singt,
dat Kalw smatkend uut`n Emmer drinkt.
Wann`k Plattdütsk häör`...
is se wier dao - de Tied äs Kind,
de nüms un nüörns jemaols mäer find -
vöwaiht hätt Lüe un Spraok de Wind!
|
